ADIVIÑAS POPULARES GALEGAS

Ola amiguiñ@s,

Hoxe deixámosvos por aquí unhas adiviñas moi galegas... Por se non as adiviñades deixámosvos a solución oculta, para descubrila tedes que seleccionar entre os asteriscos.

Que é unha cousiña, cousa: dous dereitiños, un dálle-dálle, catro mexafontes e un rega-montes.

*A vaca: Os cornos, o rabo, os tetos e o mexadoiro*

Unha señorita moi enseñorada, chea de remendos sen unha puntada.

*A galiña*

Cucurico non ten ollos, cu nin bico, e os fillos de cucurico teñen ollos, cu e bico.

*O ovo e o pitiño*

Cando vai para monte dálle os cornos a casa; cando vai para casa dálle os cornos ó monte.

*A forcada que leva o home ó lombo*

Anda e non ten pés; come, e non ten boca, e toda a comida lle parece pouca.

*O muíño*

Pelo con pelo e o vivo no medio.

*O ollo entre as perfebas*

Unha cousa para quen sempre chove e sempre está mollada.

*A lingua*

Unha cousa que coa súa risada perdeu a súa anada.

*O ourizo da castaña*

Dez señoritos de par en par pasan o río sen se mollar.

*Os dez fungueiros do carro*

Estou pensando, pensando; de pensar vólvome tola. Coa sogra da muller de meu irmán, ¿que parentesco me toca?

*A miña nai*

Unha velliña engorrumillada cun tranco no cu e sen unha puntada.

*A uva pasa, co seu rabo*

Cando vai para monte vai cheo, cando vén para casa vén baleiro.

*O pucheiro de levar o xantar*

Detrás daquel coto, hai un boi xoto, e non me hai home nado, nin por nacer, que na súa corte o poida meter.

*O sol*

Capullo sobre capullo, capullo do mesmo pano, senón que cho diga eu, non o acertas neste ano.

*A cebola*

Dous bois brancos nunha corte de ferro metidos.

*Os ovos na tixola*

Ten un dente e tira pola xente.

*A campá*

Cando vai para monte, vai engorrumillada e ó vir vén estarricada

*O adival do carro*